الاثنين، 7 يوليو 2008

زجل (فرحنا اسلامي)

http://akhawat.islamway.com/forum/uploads/post-46243-1224817406.jpg

الزجل ده حفظه من زمان
ومعرفش مين اللي مؤلفه صراحة
وينفع يتقال في حفلات العقد ف المسجد وفي صالات الافراح

زجل أفراح

الناس بتعمل فرحها في الصالة والنادي
تدفع شقى عمرها واحنا بنادي
ماتيجي نعمل فرحنا بسنة الهادي
دا رضاه على أمته من رضا مولاه


نقرا كتاب ربنا لو مات لنا واحد
وكأننا بنعلقه من شر عين حاسد
لو قريناه في الفرح نزعل ونتاخد
ونقول قلبتوا الفرح ميتم لا حول الله


مين زينا مين في الفرح يا خوانا
لا نظرة تئذي العين ولا خلطة تفتنا
مشاكلنا مهما تزيد الحل من دينا
بس احنا يا مسلمين اسلامنا ضيعناه


مين غير خنا وذنوب يا محلى أحفالنا
يا شبابنا انووا وقول ان شا الله عقبالنا
هنغيظ كده ابليس ونكيد في عزالنا
لا جواز زهدنا فيه ولا نسل حددناه



يا عريس عروستك أمانة هتتسأل عنها
عرفها معنى الدين حفظها قرأنها
معنى العفاف والصون جوة الحجاب زانها
محلى حياتكم سوا في ظل شرع الله



وابني معاها البيت ع التقوى والسنة
دا طريق حلاوته أكيد وأخرته الجنة
وافتكروا مهما حييت هتعيش وتتهنا
وتنول رضا مولاك فوق اللي تتمناه



وحسن العشرة دي وصاك بيها رسول الله
عدل وصبر شفقة ورحمة ولين وأمان
واللي بيعمل سنة سيده قول يا هناه
جوة الجنة ويا صحابته هتتلقاه


واوعاك تيجي في يوم تسألها حقي فين
حقك دوا انت يا خويا جبته منين
ياللي قريتلك آية وحكمة على حديثين
اسمع يا بني مني نصيحة لوجه الله


اعمل واجبك واكتر حبة بالمعروف
يوصل حقك واكتر منه بكرة تشوف
وتعلي دينك وتبقى بالحق شغوف
وارضوا بدينكم الحب الاصلي مادام ف الله



وارضي حماتك ترضي مراتك ترضي أبوك
واكرم أهلها تكرم أهلك واللي جابوك
اسمع يا بني مادام حبيتهم هيحبوك
أصل الحب دا من اسلامنا اتعلمناه


وانتي يا ستي دولة وصايا خديهم ليكي
دينك قالك لجوزك وبيتك حق عليكي
كوني عبدة يكونلك عبد ما بين ايديكي
وارضوا بدينكم الحب الاصلي مادام ف الله



وخلي حياتك وقف لجوزك ولأولادك
واوعكي تسمعي كل كلام يقولوه حسادك
بيتك يا بنتي جهادك واستشهادك
مهما قالوا ووجعوا دماغك بالمساواة


لما انهزموا ف كل ميدان دخلوه اعداءنا
كانت الخطة بمكر وخسة فساد أخلاقنا
هدموا بيوتناوفسدوا شبابنا وعروا نساءنا
واحنا أهوه رجعنا خطوة بخطوة يا حول الله



تعليقات: 0