الأحد، 29 نوفمبر، 2009

وصلت ل 100 ألف بفضل الله

السلام عليكم ورحمة الله وبركاته

كل عام وأنتم بخير

بمناسبة عيد الأضحى

والحمد لله

وصل تحميل الاناشيد من على المدونة

الى أكثر من 100 ألف داون لوود

على أربع أكونت على الفور شيرد

وكان النصيب الأكبر للتحميل هي أناشيد الأفراح

اللهم لك الحمد ولك الشكر

وان شاء الله عندي امل كبير في أن يصل التحميل الى مليون

والله المستعان

تصنيفات الأناشيد كالتالي











لا تنسوني من صالح دعائكم
أخوكم
محمد سليمان
[....]

الثلاثاء، 17 نوفمبر، 2009

بعد شهر ونص من الدراسة.. مواقف وطرائف 2



السلام عليكم ورحمة الله وبركاته

أعتذر في التأخير عن الكتابة فقد كانت الايام السابقة لي مليئة بالأحداث والمستجدات

ان شاء الله سنكمل بقية المواقف والطرائف

لابد من ابتلاء
بعد لمااتكلمت عن الشباب اللي بيضحوا بأجازتهم عشان يساعدوا زملائهم
كان للأسف فيه ضحايا مساعدة الناس وقضاء حوائجهم
وكان من ضمنهم العبد لله
نبدا من الاول
بنروح الكلية الصبح بدري قبل كل الناس في معظم الايام علشان بنشرح مواد الكلية الصعبة على طلبة سنة أولى الجدد وكان كل واحد من فريق العمل بيقعد في الكافتيريا وحواليه من 7 الى 10 طلبة بيشرح مادة معينة وده بيبقى قبل المحاضرات وفيه كمان بعد الكلية
وبفضل الله استفادت شريحة كبيرة جدا من الطلبة وكنا بنعمل شورحات لمادة صعبة على الناس بشكل موسع وكان بيحضر فيهاما يقرب من نصف الدفعة ...وبفضل الله لاقت استحسان الطلبة اللي استفادوان تلك الخدمات
وكنا بفضل الله وضعنا كتب للتصوير لحد ما تنزل الكتب بتاع الكلية
ووزعنا مذكرة امتحانات والتي لها سمعة طيبة في كليتنا بفضل الله
بالاضافة الى كثير من الخدمات الفردية
وكانت تلك الخدمات تحتاج الى وقت ومجهود واعداد حتى تنزل بأفضل صورة وأحسن وجه
لكن كل ذلك لم يرق الى أمن الدولة في كليتنا والادارة التابعة له !!
فاستخدموا أخس الاساليب لمنعنا من تقديم الخدمات للطلبة
فأرسل عميد الكلية الى أحد أقاربي وكمان الى أحد الموظفين من بلدنا يهددهم ويقول لهم خلوا محمد سليمان يهدي اللعب شوية ويبطل التجمعات اللي بيعملها في الكافتيريا دي !! ويبطل يدخل المدرجات ويخطب في الطلبة ويقلهم دروس !! الأمن قالي أنا هعتقله من الكلية وأنا قلتلهم لأ !! ما يصحش تعتقلوا طالب من داخل الكلية وبعدين احنا ف كلية طب !! ما يصحش يا جماعة !! هكذا نقل الكلام لي
كما هدد أهلي بأني اذا ذهبت الى الكلية هذه الايام فلن يدخل الكلية ومعرض للإعتقال !! وممكن يترفد رفد نهائي !!
طبعا كأي أهل في الدنيا هيخافوا على ابنهم وخاصة أنه في آخر سنة في الكلية وقلبوا البيت على
وفعلا حالة بيتي صعبة جدا يارب الهمهم الصبر والثبات
هكذايفعل الظالمون يستخدمون أخس الوسائل لإبعاد الاسلاميين والعاملين للاسلام عن الساحة
ودي سنة من سنن الله في الكون
(ولولا دفع الله الناس بعضهم ببعض لفسدت الارض)
نكمل
طبعا لما حصل الموضوع أنا بصراحة فرحت !! ما تستغربوش أيوة فرحت
حسيت انا احنا ماشيين صح وعلى الطريق
( أحسب الناس أن يتركوا أن يقولوا آمناوهم لا يفتنون )
وتاني يوم نزلت الكلية بنفس قوية يحدوها روح التحدي والاصرار وتقديم افضل ما عندي
لنفاجأ بعدها بإنذار يأتي الى البيت واستدعاء ولي الامر !!
طبعا للضغط علينا من ايدينا اللي بتوجعنا وهي أهالينا
وتم تخويفهم أحياناوترغيبهم احيانا
المهم عدى الموضوع
ليمر يوم او يومين
وتعلق لوحة تعلن عن التحقيق مع 11 طالبا بتهمة تعليق لافتات بدون اذن الادارة


التحقيق وما أدراك ما التحقيق !
كان الهدف من التحقيق هو وجود مبرر قانوني لعدم تقديم أسرة قانونية ازاي هنقدم اسرة وفيه 11 واحد من الاسرة بيتحقق معاهم
ذهبنا الى مكان التحقيق
ودخلنا واحد تلو الآخر
وجاء دوري
العبد لله : سلام عليكم
الدكتور اللي بيحقق معايا : وعليكم السلام
تجلس سكرتيرة تكتب وأحيانا تسأل
نبدا
يلا بينا
ما رأيك في التهمة الموجهة اليك وهي الخروج على نظام الادارة بتعليق لافتات بدون اذن الادارة مما يعرضك للمساءلة القانونية !
قلت : لم أعلق لا فتات ( وفعلا ما علقتش ) ولا أدري كيفوجهت التهمة لي حيث أنني في أجازة سنة خامسة !! ( وفعلا ما كدبتش )
هل بينك وبين الوكيل أي خلاف أو عداء
قلت لا أدري ولماذا وجهت الى تلك التهمة
فتدخل الدكتور اللي كان قاعد وقال للسكرتيره : السؤال بتاع حسبنا الله ونعم الوكيل جه ولا لسة ؟!!
ضحكت وضحكنا جميعا
قالت السكرتيره : هل لديك اقول أخرى
قلت نعم أولا انا في سنة ساتة وليس في خامسة كما ورد في عريضة الاتهام ثانيا بقالي خمس سنين بقدم في الاتحاد وكل سنة بتشطب من القوايم برغم كوني عضو في اللجنة الطلابية للجنة الجودة وشاركت في حفل استقبال دفعة الجودة وتقدمت ودخلت مسابقات القرآن كاملا في مسابقات رعاية الشباب وكان لا يتم اعلان النتيجة الا بعد مرور انتخابات اتحاد الطلاب !! وفي حالة توقيع عقوبة علي سألج للحصول على حقوقي بالطرق القانونية المشروعة ! وبس


اقفل التكييف !!
لما دخلت غرفة التحقيق كان التكييف شغال فحسيت بالسقعة شوية فنظر الى الدكتور اللي بيحقق معايا وقالي هاقوم أقفلهولك يا عم لاحسن تقول اننا مش مريحينك !! بس بصراحة كان موقف شيك جدا


دخل الاخ اللي بعدي وكان في سنة ساتة
فدخل على الدكتور وكان فيه دكتور تاني جه فبيسال هو فيه ايه
قاله : يا بيه دول ناس محترفين في التحقيقات بقاله ست سنين على الشكل ده !! مش هواه
وقاله هتقول زي ما محمد سليمان قال ؟!! ولا تحب تضيف سيادتك حاجة ؟!!
قاله لأ زيه !!
الموضوع كله صوري وتقفيل ورق والدكتور فاهم كدة والعيد والوكيل !!

الغريب ان قائد الحرس وموظف أمن الدولة وشخصية تانية كدة لابسة بدلة ونضارة سمراء دخلوا قبلنا للدكتور!!
عادي عادي متعودين على كدة



وبعدها بكام يوم جالنا استدعاء لمقابلة وكيل الكلية
وأول ما دخلنا عليه قالنا : انتو عيال كدابين ...كلكم كدابين !!
ليه بس يا دكتور
لو انتوا علقتم قولوا علقنا وما تخافش من حاجة !!
طيب كلنا ما علقناش
ليه كلكم كدابين يعني !!
وقعد هيزأ فينا شوية
قلتله يا دكتور لو حضرتك جاي تهزأ فينا ومش هتسمعنا فنمشي من دلوقت
قال هسمعلكم بس لما أخلص كلامي !!
أوك ماشي مافيش مشاكل

واتكلم كتير عن الاخوان وانه زمان اتعرض عليه يمشي مع الاخوان بس رفض وانه كان ماسك اسرة الاخوان زمان اسرة الندى وشويةحاجات ظريفة كدة
بس يا شباب انتوا محتاجين تقرأوا في فقه الدعوة كويس شوف النبي كان بيتعامل مع الصحابة ازاي في المدينة وموقفه مع بن سلول وانه مقتلهوشي ...تدخلت بقولي طيب يا دكتور النبي لما كان في مكة كان ايه وضعه بالظبط ؟!
قالي استنى لما خلص كلامي
ماشي

وتكلم كثيرا ما يقرب من تلت ساعة وقالنا في ناية الحوار هما طالبين منيأني أفصل ناس منكم والورقة أهي ؟
فبصيت في الورقة لاقيت اسمي مشرف فيها !!
فتعجبت طب ازاي هتفصل الناس ف الاجازة يا عالم
حقا اننا في مصر
عادي
قلتله يا دكتور يعني ايه هما طالبين من حضرتك تفصلنا ؟ يعني الأمن هو اللي بيمشي الكلية ؟
نظر الي وقال : أيوة يا لمض وبلدك كلها ماشية كدة !!
والله الدكتور عجبني ...صريح

وفي نهاية الحوار دا كله قالنا
أنا كنت هفصل ناس منكم
بس هخليها المرة دي انذار بالفصل بس وهيبقى شفهي
قالناله شكرا يا دكتور وجزاكم الله خير
اتفضلوا
فاتفضلنا


بدعوة أخ
سبحان الله قد يكون التغير المفاجئ في المعاملة بسبب دعوة أخ بليل ان ربنا يرفع الكرب عن اخوانه ويحفظهم ويصونهم من أي اذي والقلوب بين أصبعين من أصابع الرحمن يقلبها كيف يشاء
وهعلمكم دعاء حفظته من الحاج صبحي ندا ( من الرعيل الاول ) كان بيقول يا أخوة لو دخلتم على شخصية ظالمة أو متكبرة فاقرأ عليه هذا الدعاء
أقبلت عليكم بلا اله الا الله أن تقضوا حاجتي بمحمد رسول الله ألجمت فاكم بلا حول ولا قوة الا بالله ...اخضعوا اخضعوا اخضعوا )
وكان بيقولنا انه له تاثير السحر
وقبل ما ندخل للوكيل اقعدت أحفظه للإخوة قبل ما ندخل ولما دخلنا كله ابتدا يقرأ الدعاء ده فلاقيناه هادي جدا جدا على غير عادته فعلا والله حاجة غريبة واعطانا فرصة للكلام على غير العادة

وبفضل الله استمرينا في شغلنا ولم تلهنا تلك المشاكسات العقيمة
والله المستعان


مدير المنتدى
من الطبيعي في أي مؤسسة أن يكون لها مدير وفيها فريق عمل يدير المؤسسة
فكان من ضمن المواقف الظريفة في المنتدى
إن فيه أولاد بتدخل المنتدى وبتكلم بنات ع الخاص ويطلبون الايميل وكدة
فأرسل رسائل تحذير للمرسل
ولما يتمادي تحذف عضويته نهائيا
فحدث ذلك مع عضو واحد بس وتم حذفه فوجدته يبعث لي رسالة بيشتمني فيها بأقبح الشتائم ..وكلام كدة مش ظريف
ويقولي أنا فلان باسم شخص تاني صديق لي !!
طبعا انا زعلت شوية بس نسيت الموضوع عشان قلبي طيب

ومن ضمن المواقف الظريفة ان بستاذن عضو بقوله ممكن أنقل الموضوع لقسم تاني فيقولي انقل براحتك يا عم المنتدى كله بتاعك !!






الرحلة والبنات
زي ما قولتكلم اني ف أجازة
فحبيت أطلع أنا واصحابي رحلة دا احنا ف أجازة
وكان في نفس الوقت اعلان عن رحلة في رعاية الشباب
فروحنا وقلنا نحجز
فقالنا أحد الطلبة المنظمين : جايبين معاكم بنات ولا لأ ؟
قلنا : لأ !!
ويستهزأ طالب آخر ويقول هي الرحلات حلال ولا حرام
قلتله لو هي حرام انت بتطلعها ليه
سكت واتقفل طبعا هو صاحبي بس كان بهزار يعني !
ودخلت موظفة رعاية الشباب وما رضيتش تاخد الاشتراك معلله السبب ان الامن مش هيوافق عليكم !!
قلت في نفسي : الله يخرب بيت الامن وسنينه هو ورانا ورانا
فكان فيه اخ ظريف قال : أولئك لهم الأمن
طبعا المقصود الأمن من الله مش الأمن المركزي !!
وفعلا ما رضيتش تاخد الاشتراك



الشيخ وظابط المباحث
عندنا في كليتنا بعد الصلاة في مسجد الكلية بيكون فيه كلمة بعد الصلاة مدتها 3 دقائق وبيعلق عليها شيخ المسجد
وف يوم من الايام بعد ما خلصنا الصلاة وبنسلم وكان عليا كلمة المسجد في يومها تكلم الشيخ
لكم أن تتخيلوا وهو بيقول : السلام عليكم ورحمة الله ..بسم الله الرحمن الرحيم الحمد لله ....بداية الكلمة وهو على جلس التشهد !
المهم تكلم الشيخ بغير تنسيق معنا وكانت جديدة شوية
وبعد الكلمة من قبل ما نكلمه كلمنا وقالنا معلش يا جماعة غصب عني مدير المباحث بيصلي معانا النهاردة ومعلش وبتاع وكدة !
قلنا ماشي مافيش مشاكل بس ابقى قلنا قبلها عشان نعمل حسابنا


يااااااااه
معلش طولت عليكم وكمان ايديا وجعتني من الكتابة
اشوفكم الاسبوع الجاي
استودعكم الله
[....]