الجمعة، 9 مايو 2008

ضكتور كعبول في طب المنوفية



من مقامات الأفول في وصف ضكتور كعبول




حدثنا شنوفي مهيطل زعبلة الدهل
وهو أحد جيراننا في السكشن يطل فقال:
بعد رحلة العناء... ومشوار الشقاء... وسكة البلاء بين تقل العربي والكيمياء ....وصعوبة الفيزياء ....ورخامة الأحياء
وبعد رحلة الدروس... ومئات الجنيهات من الفلوس ....وعلى جيوب أهله يدوس
وصل كعبول إلى مثواه الأخير.... بعد روحه ما بقت في المناخير
وآدي كانت فرحته... لما ظهرت نتيجته... وجاله الجواب على بلدته ...وقلع يا ناس جلبيته... ولبس البالطو في كليته
وقرر كعبول يبطل أكل الملوخية... ابتسم أنت في طب المنوفية
وقرر أيضا يبطل أكل الفول ....ويحضر الطابور... عفوا قبل الدكتور
دخل كعبول المدرج ....لقى اللي ما يشتري يتفرج
بص كعبول مالقاش له مكان... لأن المدرج بالطلبة مليان... قعد يعيط وأصيب بالغثيان
والله لروح لمدير الكلية... ازاي ما يبقاش فيه مكان ليه
يا بني اقعد على السلم... وركز يا بني وما تبقاش مبلم
جلست أستمع إلى الدكتور بإزبهلال ...وأدهشني من الدكتور براعة الاستهلال
وبعد مرور ربع ساعة... أصبحت زي ما يكون وقعت ف بلاعة... يا بني هات الولاعة ...نحرق سجارتين قبل انتهاء الساعة
عفوا أخوك خرمان... من المحاضرة جربان... وعاوز أجري منها زي الرهوان
ياااااه المحاضرة بقت فنيتو.... وجريت وقلت يا فكيكو
صرخت بهستيريا ...هيا بنا الى الكافتيريا
نظبط الدماغ بكوباية شاي... أصل المحاضرة خلتني أقول جاي
يا عم عاطف واحد شاي واتنين طعمية... نظبط الدماغ مية مية
وبعد ما شربت الشاي التمام... دفعت الفلوس بهدوء واحترام... وذهبت الى السكشن في الموعد التمام.. أحمل شنطتي كالأسد الهمام
دخلت سكشن التشريح... لقيت المعيد بالطلبة يطيح
العيال متكتولين على الجثة... زي ما يكون هياكلوا منها حتة
هي اللحمة رخصت والا إيه.... وقررت أزاحم زي البيه
شوفت من الجثة قدر رمح ..آآه يا ريتني جيت هنا من الصبح
حرقتني عينيا من الفورمالين... وخدت رست وكلت مندولين
وفي اليوم التاني دخلت سكشن الهستولوجي.... بعد محاضرة الفسيولوجي
دخلت المعمل وعطست عطسة... وطلعولي في الرسم القطط الفاطسة
واليوم اللي بعده دخلت البيو ملهوف... وأدهشتني الاحماض على الرفوف
وضعت في الانبوبة المحلول... وحطتها على النار لتفور... وقعت على هدومي حرقتها يا خسارة البالطو الجديد
دخلت الفسيولوجي رابع يوم... بس بصراحة الدكاترة طلعوا نجوم ...عملنا تجارب الدم سريعا والمعمل بقى بالدم يعوم
كراسة العملي يالا خلصوها... قبل ما نحط أصفار تخدوها
وخلصت السنة سريعا ...كدت أن أقع على الارض صريعا
دخلت الامتحان النظري بحرارة ...وجاوبت على نص الاسئلة بجدارة
وفي الامتحان الشفوي الكوسة.... سلم على بابا واديله بوسة
قلت بلاش الطب ده ...ابعد عنه وكفاية بلاه
أشحت بشرف أحسنلي... بعيشة كريمة توفرلي
هي دي كانت حكايتي .... حكاية ضكتور كعبول

يارب يكون عجبكم البوست ده

تعليقات: 13

أبو سليمان يقول...

ايه يا جماعة محدش عايز يرد ليييييييييييه؟!!!

حالة فردية يقول...

اولا الف مبروك ع التدوين بس اهم حاجة متكونش من المتسرعين الرد قدامه قول ايام ..... شهور ..... او ممكن سنين ... يارب اجعل مدونتك من المقبولين .... قولوا امين

غير معرف يقول...

ايه الحلاوة دى ياابنى انت طلعت امين الديب واحنا مش عارفين ولا ايه ............
على العموم الف مبروك على التدوين ونطمح فى المزيد وياريت يكون ليك مقالات عن الظروف االمجتمعية.......
ويريت تحاول تضع بعض الحلول والنصائح من وجهة نظرك فى إخر كل رسالة ولا تكتفى بعرض الواقع

غير معرف يقول...

بصراحة عندك حق ياابن الناس الطيبين دى طلعت كلية زى الطين مع ان فيهاطلبة كويسين

غير معرف يقول...

الراغبة في العفو من الله
بجد ربنا يحفظكم ويزيدكم هدى وفضل من عنده
الله يحفظك يا د\محمد

غير معرف يقول...

في البداية نشكركم ع الموقع الرائع
لكن ليا عتاب
انتو كده بتعقدو طلبة اولى اللي لسة داخلين وانا منهم
ليه بس كده

غير معرف يقول...

ربنا يوفقك يا دكتور والله بدعيلك ربنا يوفقك في امتحاناتك ياريت تطمنا عليك لما تخلص امتحانات
ربنا يحفظك

غير معرف يقول...

ر يا دكتور محمد والله حفلة النقابة لسنة اولي كانت فعلا محتاجة وجودك والله وجودك كان هيخليها احلي بصوتك العذب وانشادك الممتع لكن احنا مقدرين ظروف امتحاناتك وبتمني لك التوفيق واسأل الله ان يجعلك ذخر للمسلمين وان يوفقك ويتقبل منا ومنكم وكل سنة وانت طيب اتمني نستمع اليك في صلاة التراويح بصوتك العذب بس ياريت تبلغنا هتصلي في اي مسجد

غير معرف يقول...

ر يا دكتور محمد والله حفلة النقابة لسنة اولي كانت فعلا محتاجة وجودك والله وجودك كان هيخليها احلي بصوتك العذب وانشادك الممتع لكن احنا مقدرين ظروف امتحاناتك وبتمني لك التوفيق واسأل الله ان يجعلك ذخر للمسلمين وان يوفقك ويتقبل منا ومنكم وكل سنة وانت طيب اتمني نستمع اليك في صلاة التراويح بصوتك العذب بس ياريت تبلغنا هتصلي في اي مسجد

fariza يقول...

الله عليك
كعبول ايه بقى
دا نت بقيت شاعر كبير
لا تقولى تشريح ولا تحضير
فى الكراسة كلمتين زى الفل .. تبقى كبير
والناس تقول عليك شاعر خطير
أصل الطب اليومين دول ما يأكلشى فطير (أقصد بالسمنة البلدى سيبك من السمن الصناعى ده تعب بطوننا)
جميلة جدا يا دكترة وعقبال التدوينة القادمة
تكون أحلى وأجمل وياريت لو تدينى فى الشعر مقدمة

البراء يقول...

السلام عليكم
والله يا دكتور ما تعودنا عنك أقل من ذلك فإلى الأمام ان شاء الله ونحن ورائك ندعمك ونقوى ظهرك ونساعك ان احتجت المساعدة ولا تقلق فها هو ابن عطاء الله السكندر يرسل لك رسالة حميمية يقول لك فيها "أرح نفسك من التدبير فما قام به غيرك عنك لا تقم به لنفسك" أشهد الله أنك أحب الإخوان لى فى الله وأقربهم إلى قلبى وقالبى
أخوك المتيم بحبك المحب لك دوما Islamophilia@yahoo.com
ممكن تضيفنى من فضلك للتواصى بالخير

طبيب اطفال يقول...

وعليكم السلام ورحمة الله وبركاته
الله يبارك فيك
جزاك الله خيرا وعلى فكرة حضرتك أول واحد يشترك عندى ويعلق

غير معرف يقول...

I enjoyed reading your blog. Keep it that way. agofahnthcawjxuh