الاثنين، 17 أغسطس 2009

منها لله الامتحانات ...قبحها الله من امتحانات



في أي كلية عدلة ( بتوحد ربنا) في مصر
البشر اللي فيها بيبدأوا عادي في نصف شهر سبتمبر
ويمتحنوا في شهر 6
وياخدوا الاجازة ويتمتعوا بيها
لكن بعيدعنكم وبعيد عن السامعين (الا اللي غاوي طبعا)
في كلية ليلها نهار ونهارها ليل !!
امتحاناتها في وقت أجازة الناس التانيين!!
وأجازتها في أوقات الدراسة العادية!!
حسبي الله ونعم الوكيل
الواحد اتخنق خلاص من الامتحانات والمذاكرة والحر و...و...
يلا الحمد لله
ربنا يجعله في ميزان حسناتنا ان شاء الله
طلبة طب دول مجاهدين بمعنى الكلمة (جهاد طلب العلم)
المهم
منها لله الامتحانات
اللي تمنع الناس من الاستمتاع بالاجازة
منها لله الامتحانات
اللي تمنع الناس من المصايف زي البني أدميين
منها لله الامتحانات
اللي بترفع الضغط وتجلب الصداع وأحيانا السكر (بعيد عنكم وعن السامعين )
منها لله الامتحانات
اللي هتحرمني من الاستمتاع برمضان والاستعداد له
منها لله الامتحانات
اللي هتخليني أصلي التراويح وأنا قاعد بفكر في الامتحان (ادعولي بالخشوع)
منها لله الامتحانات
اللي بترفع مستوى الادرينالين في الدم وبالتتابع يؤثر على أجهزة الجسم
منها لله الامتحانات
اللي بتعمل ضغط نفسي على الواحد وده بعيد عنكم بيعمل (قرحة في المعدة وتأثيرات فسيولوجية ونفسية أبقى أحكيلكم عليها بعدين)
منها لله الامتحانات
اللي بتفرق الأحباب والاصحاب وتبعد المسافات
منها لله الامتحانات
اللي بتربي الكرش (مشكلة طلعلي كرش !!! هبقى قيادي على رأي دكتور حر!!)
منها لله الامتحانات
اللي بتضعف النظر وتخبل الدماغ وتغيب العقل
منها لله الامتحانات
اللي بتخلي الدكاترة يتحكموا فينا وفي مصيرنا والشفوي وما أدراك ما الشفوي في كلية طب ؟ الله لا يوريكم
منها لله الامتحانات
اللي بتحبس الواحد في البيت زي المعتقل (الله لا يوريكم) بين أربع حيطان ومكتب وبضعة كتب وشوية أقلام وأوراق متناثرة
منها لله الامتحانات
اللي ....كفاية كدة ....الله يسامحها نعمل ايه بقى

شعارنا في الامتحانات
نحن قوم لا تهزنا الجبال العوالي
فكيف بورقة كتب عليها : أجب عن السؤال التالي !!


وقفة
كنت أتحدث مع الست الوالدة في صبيحة أحد الامتحانات وكنت قلقان جدا
قالتلي لو نعمل حساب امتحان الاخرة نص اللي بنعمله في امتحان الدنيا كان زمانا حاجة تانية خالص
والله عندها حق
لو الواحد بيشيل هم صلاة الفجر زي ما بيشيل هم الامتحان كان زمانه ما فوت صلاة فجر واحدة
ولو حمل هم القبر ما تناسى قيام ليل أبدا
يلا الحمد لله

دعواتكم معايا يا جماعة في رمضان
ادعولي أنا وجميع مجاهدي الطب وانتوا بتصلوا التراويح وبتصلوا التهجد
لا تنسونا بدعائكم ...وربنا ما يحطكم في زنقة
وبمناسبة رمضان
شوية تصميمات كنت عملتها قبل كدة
اتفضلوا






أخوكم
محمد سليمان
من مجاهدي كلية الطب

تعليقات: 13

طالبه الفردوس يقول...

السلام عليكم

اعانكم الله واهم شئ تجديد النيه

جمعاوى يقول...

منها لله الإمتحانات اللى بتخلينا مش نشوفك

(:



واحشنى

..

مسلمة من أرض المشرق يقول...

أعانكم الله وأخرجكم منها بخير

لا تنسوا تجديد النيه كى يكون التعب بأجر ان شاء الله

جعل الله مدونتكم ذخرا للإسلام والمسلمين

همسة يقول...

فعلا منها لله الأمتحانات
ربنا يوفقك ويعينك
ورمضان كريم

ضكتور جدا يقول...

طالبة الفردوس
مرحبا بكي
ان شاء الله نجددها
كله على الله

ضكتور جدا يقول...

أخويا الحبيب جمعاوي
نورتني ونورت مدونة أخوك
ادعيلي بشدة

ضكتور جدا يقول...

أختنا الكريمة
مسلمة من أرض المشرق
نورتي المدونة
ولا تنسونا من الدعاء

ضكتور جدا يقول...

الاخت الكريمة همسة
شكرا على تعليقك
ولا تنسونا من الدعاء

تلميذة سلمان الفارسى يقول...

ربنا يوفقكم يارب
ويجعله فى ميزان حسناتكم
المدونه جميله جدا ماشاء الله

غير معرف يقول...

جزاكم الله الجنة على صبركم
"انما يوفى الصابرون اجرهم بغير حساب "
وعددوا النوايا تؤجروا
نية المذاكرة :
1 الدعوة الى الله
2- وأعدوا لهم ما استطعتم من قوة
3- للعمل وكسب المال وانفاقه فى سبيل الله
4- المؤمن القوى خير وأحب عند الله من المؤمن الضعيف
5- دراسة العلم للتفكر فى خلق الله
6- الابتعاد عن الغش ( من غشنا فليس منا

غير معرف يقول...

ربنا يكون في عونكم

سددوا وقاربوا في رمضان

قال معاذ بن جبل رضي الله عنه

: (تعلموا العلم فإن تعليمه لله خشية، وطلبه عبادة، ومذاكرته تسبيح، والبحث عنه جهاد، وتعليمه لمن لا

يعلمه صدقة، وبذله لأهله قربة، لأنه معالم الحلال والحرام، منار سبل أهل الجنة، وهو الأنس في

الوحشة، والصاحب في الغربة، والمحدث في الخلوة، والدليل على السراء والضراء، والسلاح على

الأعداء، والزين عند الأخلاء، يرفع الله به أقواما، فيجعلهم في الخير قادة وأئمة تقتص آثارهم، ويقتدى

بفعالهم، وينتهى إلى رأيهم، ترغب الملائكة في خدمتهم، وبأجنحتها تمسحهم، يستغفر لهم كل رطب

ويابس، وحيتان البحر وهوامه، وسباع البر وأنعامه، لأن العلم حياة القلوب من الجهل، ومصابيح

الأبصار من الظلم، يبلغ العبد بالعلم منازل الأخيار والدرجات العلى في الدنيا والآخرة، والتفكر فيه يعدل

الصيام، ومدارسته تعدل القيام، به توصل الأرحام، وبه يعرف الحلال من الحرام، هو إمام العمل،

والعمل تابعه، ويلهمه السعداء ويحرمه الأشقياء

ضكتور جدا يقول...

الى الذي نصحني وهو مش معروف
ربنا يجزيك عني خير
وجزاكم الله خيرا على النوايا والنصيحة
ربنا يتقبل

الراغبة في عفو الله يقول...

رربنا يعينكم ويوفقكم جميعا يارب وكل طلبة المسلمين ويكتبنا واياكم من المجاهدين لنصرة دينه
اصبر واحتسب يا دكتور وربنا ان شاء الله يكرمك ويوفقك
جزاك الله خير ع هذه المدونة الرائعة