الأربعاء، 27 يناير 2010

دكتور راكب عجلة نصر

http://1.bp.blogspot.com/_KZkM5MNjOao/SSlmyHm5liI/AAAAAAAADIw/SjVVIDSUSvI/s400/Funny-Bizarre-Bicycles-0012.jpg


دكتور راكب عجلة نصر


كنت أستغرب كثيرا من زملاء لي في قرى مجاورة عندما كان يقول أحدهم : أنا ما بركبش عجلة في بلدنا !
ليه يا عم
يرد قائلا : يا عم انا دكتوووووور !
ما ينفعش خالص


قصتي مع العجلة النصر


في تلك الليلة جاء السباك علشان يصلح عطل في السباكة في البيت وكان عاوز شوية طلبات من برة
ولأني مستعجل شوية عرض عليا اني آخد العجلة بتاعته
ولكم أن تتخيلوا هذه الدراجة النصر !
التي انقرضت في معظم البلاد

كرسي يرتفع الى أسفل صدرك
أو مايسمى بلغة الطب subcostal angle
الجادون بتاعها مميز جدا اطار عريض وله قبضتين تقعان بشكل عمودي على ذلك الاطار
البدال بتاعها طويل جدا
الخطوة في البدال بتعمل حوالي 3 متر مسافة في الطريق !
عندما تركب وتبدا في السواقة ! ترى امامك الاطار الامامي يمتد مسافة متر أمامك
يعطيك الاحساس بأنك تسوق شاحنة كبيرة
المهم
كان نفسي أركب العجلة دي من زمان
والحمد لله تحققت امنيتي
وركبت العجلة
وكنت سعيد جدا

وسقتها وانطلقت الى محل الحدايد والبويات الذي يبعد عننا بمسافة 150 متر
وانطلقت على الشارع الرئيسي للبلد
أو ما يعرف بشارع الزراعية
وطبعا انا معروف في منطقتي بإني دكتور
وعامل فيها برستيج شوية !
والدكتور راح والدكتور جه !
وكل ده واحنا ما نعرفش حاجة في الطب الا شوية معلومات نظرية
وقليل من العملي ! ( مش موضوعنا )

المهم أول لما طلعت على الشارع الرئيسي
كانت نظرات الناس الي مختلفة !
ابتسم ابتسامة خفيفة لتلطيف الجو

ايه الحلاوة دي يا دكترة !
صوت يأتي على يساري
فأنظر فإذا هو أخ في بلدنا
يقولها وهو مش مصدق نفسه
وقعد يضحك بهستيريا


المهم انطلقت

وجبت الشئ المطلوب للسباك
وعدت أدراجي الى البيت وأنا أسوق تلك الدراجة الرهيبة
أتلاعب بها على الطريق بين السيارات
كأنني مايكل شوماخر
واللي يشوفني ينظر متعجبا
هو فيه لسة عجل من ده
وبعدين دكتور اللي راكبها !

وروحت وأنا سعيد بتلك الرحلة القصيرة



سؤال
هو عيب إن دكتور يركب عجلة في بلده ؟

أحيانا ألاقي أصحابي ما بيركبش عجلة في بلده
ولما نكون بنزور حد في بلد نائية شوية زي بعض قرى اشمون ومنوف تلاقي المواصلات هناك نص نقل
وبنركب مع بعض وممكن تلاقي تحت رجلك فرخة أو وزة بتكاكي !
أو تلاقي واحد معاه شيكارة كيماوي أو دقيق
والبريستيج كله بيضيع

ويتخذ قول الشاعر مبدأ
( البلد اللي ما يعرفكش حد فيها ...اتق الله فيها ) !!
طبعا في مثل تاني بس عشان الرقابة !



هل عيب أن يركب دكتور عجلة في بلده ؟

شخصيا لا أعتبرها عيبا أو قدحا في شخصية الدكتور
بل على العكس أعتبرها تبسطا مع الناس
وبتدي روح جميلة كدة


التواضع يا اطباء

!

تعليقات: 7

خواطر شابة يقول...

الدعوة للتواضع دعها شاملة فهذه الافة يعاني منها كل من يحس انه في منصب مسؤولية او اكرمه الله بمال
انا حأعمل زي الوظف في فيلم الارهاب والكباب وحأقولك في اوروبا والدول المتقدمة ركوب العجل عادي للجميع يعتبره وسيلة مواصلات ورياضة ايضا ولا يعتبره بأي حال من الاحوال مساسا ببريستيجه لكن في بلادنا الثقافة مختلفة والعقليات مختلفة واحيانا المحيط هو الذي يمنعك من فعل ما تعتبره انت عادي لكن محيطك لايقبله منك وبالتالي يقى الامر متوقف على ارادتك اما تستسلم لرغبة الحيط حتى لاتصطدم معه او تفعل اللي في نفسك لكن تحمل النظرات والتلميحات والتصريحات
تحياتي لك دكتور

نِـبْراس~ يقول...

رسـالة عظيمة تحملها بين طيات تلك القصة السريعـة
فعلا التواضـع سمة جميلة جدا , ياريت كلنا نتحلى بيها
وفقك الله
ونسألكم الدعاء لنا بالتوفيق فى الامتحانات

well يقول...

ايه الحلاوة دي يا دكترة !
حاسب لتقع ..مايقع الا الشاطر
عارف من ساعة ما بعت العجلة بتاعتى من سنين وانا ما ركبتش عجل
كنت زمان فاكر ان اللى عنده عجلة مش هيحتاج اى حاجة من الدنيا بس زهقت منها وقلبتها ..
ادينى انت بس عجلة وانا الفلك بيها البلد كلها من اولها لاخرة ...بس على مسؤليتك الشخصية
تحياتى

Take Care يقول...

وربنا نفسى من زمان وانا صغيره اركب عجله

مشخبطاتي يقول...

سلام عليكم..

هي قصة سريعة لكن معنى التواضع واضح جداً فيها :)

يابختك..غيرك مالوش في العجل !!
ماتعرفش حد.. :)

أخوك.

ريمان يقول...

السلام عليكم

والله يا بختك


ومافيهاش حاجه ابدا لو دكتور ركب عجله


والله عادى خالص


تحياتى

كلمات من نور يقول...

لا مش عيب يا ضكتور ابدا على العكس دي دعوة للتواضع وللحفاظ عالبيئة اللي راحت ..ولو حد قالك حاجه قلهم ..بلاد بره يا مصريين رئيس الوزراء بيركب عجلة ويمشي يروح شغله .يلا نقول إيه معلش احنا نحب النعرة الكدابة مع الأسف...تحياتي