الجمعة، 25 مارس 2011

يوميات طبيب امتياز - الحس الإنساني

يوميات طبيب امتياز - الحلقة الأولى

الحس الإنساني



مع مطلع شهر مارس من كل عام
تبدأ كل دفعات الطب في مصر في البدء بأول خطوة في طريق الطب - سنة الامتياز
يرتدي الطبيب البالطو الأبيض
ولبس الباالطو في هذه الفترة له مذاق مختلف عن ما قبل
فهو يشعر بأنه أصبح طبيبا ! يعالج المرضى ويكتب الوصفات العلاجية المختلفة
يتجول في المستشفى فرحا بالبالطو الأبيض ولا يعلم عن الطب الا بعض المعلومات النظرية التي عفا عليها الزمن
وما يصيب أطباء الإمتياز يصيبني
لذا أحببت أن أدون عن تلك الفترة من حياتي
وهي سنة الإمتياز
أدون المواقف التي أمر بها واللحظات التي أثرت في بشكل كبير

الحس الإنساني



في بداية الحياة العملية في سنة الامتياز يبدأ احتكاكنا المباشر مع المريض
وطبعا كلنا بيبقى قلبنا رهيف!
نتألم مع تأوهات المريض
لما بيحصل حاجة طارئة بنجري علشان نلحقه
لما بشوف طفل صغير تحمله أمه وتبكي لمرض ابنها أكاد أبكي لبكائها
لما يدخل رجل كبير يحمله أبناؤه يؤثر فيا هذا المشهد
عندما يدخل مريض الى غرفة الطوارئ أقوم من مكاني وأستقبله بكل حفاوة وأشفق عليه لمرضه

وبالرغم من كل هذا ألاقي الدكاترة الأكبر منا سنا والذين سبقونا بسنوات في رحلة الطب من السادة النواب و الأخصائيين - هذا الحس الانساني قد انحسر قليلا ليصل في بعض الأشخاص الى درجة التبلد مع المريض
نعم هو يعطيه حقه من الفحص والعلاج ولكن يعامله بجفاء
لا أدري أهو تطور طبيعي للطبيب ؟!
أم أن هذا الشعور الإنساني ينحسر الزمن ؟!
أم أن طاقة المشاعر الانسانية للطبيب في بداية حياته العملية تنتهي في أول شهور عمله ؟

أخاف أن أصل الى تلك الدرجة من الجفاء مع المريض
ولكن ما يطمئنني أن هناك بعض النماذج من الأطباء الكبار من الاستشاريين مازالت تلك المشاعر الانسانية حاضرة

الدكتور عبد الفتاح - استشاري التخدير - شخصية أثرت في حياتي برغم الأيام القليلة التي قضيتها معه
لكم أن تتخيلوا تلك الشخصية الجميلة - رجل لا بالطويل ولا بالقصير على وجهه لحية جميلة تعطيه وقار
بعض أن يطمئن على فحوصات المريض قبل تخديره يدخل على المريض ويسلم عليه بحرارة ويبتسم في وجهه ويقول له : الف سلامة يا عم فلان والله انت زي الفل وهتبقى كويس ان شاء الله - قول الحمد لله
يطمئن المريض لكلماته الجميلة - ويشعر بارتياح
وقبل تركيب الكانيولا يقول له : بص يا حج شكة بسيطة بس ومش هتحس بأي ألم تاني
يساعد المريض على وضعه في وضع النوم
ويبدأ بالتخدير
وبعد انتهاء العملية يقوم بإيقاظ المريض وبعض أن يتفتح المريض عينيه ليعود للحياة من جديد يبتسم في وجهه قائلا: حمد لله على السلامة يا عم فلان - بقيت زي الفل اهوة
كنت ملازما للدكتور عبد الفتاح أتعلم منه العلم الطبي فضلا عن العلم الانساني
وفي كل خطوة يفعلها كنت أحاول تعلمها
ربنا يكرمك يا دكتور عبد الفتاح - فقد تعلمت منك الكثير

أتمنى أن أحافظ على المشاعر الانسانية تجاه المريض طول حياتي مثل الدكتور عبد الفتاح

والى اللقاء في الحلقة القادمة

تعليقات: 12

Dr Ibrahim يقول...

ربنا يكرمك أخى..الحس الإنسانى مهم للطبيب وبالفعل كثير من الاخصائين والاستشاريين والنواب لديهم برود اتجاه المريض..مع أن التعالى والكبرياء يجب ألا يكون فى الطبيب ..فيقول لنا احد الاساتذة فى كلية الطب"متبقاش خايب ومنتاش عارف حاجة وتتعالى على المريض المريض هيقول عليك وحش انما لما تبقى متواضع وتساعد المريض وتبطب عليه حتى ولو معندكش معلومات هتكسب المريض من انه هيحبك وهيرتاح ليك"
تحياتى لك

مدونه ما كفايه بقى يقول...

السلام عليكم

ما شاء الله عليك أخى ربنا يوفقك يا رب

أطمئن أخى فلن تفقد ذلك الحس أبدا فشخص مثلك لن يفقد شىء يعرف قيمته

منتظره الحلقه القادمه

سلامى للدكتور عبد الفتاح وربنا يكتر من أمثاله يا رب

تحياتى

كلمات من نور يقول...

خليني احكيلك مع تجربتي من أسبوعين مع أطباء الإمتياز

أنا عندي قصور في الغدة النخامية وباتعالج عند طبيب في القاهرة بروح كل 3 شهور ...المهم في اسكندرية باروح لطبيب لسه واخد ماجستير وما شاء الله بيتابع حالتي ...المهم اني عملت تحاليلي ونظرا لصعوبة السفر للقاهرة رحت للطبيب هنا ولقى إن نتيجة تحليل ال

ADH
مش مضبوطه وسالني أسئلة ولقى إني باشرب ميه كتير قوي بزياده المهم طلب مني أروح مستشفى كلية الطب اعمل تحاليل تحت إشراف طبي علشان يتأكد خوفا من هذه الغدة هي كمان

رحت يا سيدي الساعه 8 الصبح زي ما قال وكنت متوقفه عن شرب الماء منذ الفجر وطبعا الكليه فاضيه والقسم يادوب فيه عامله أو اتنين

شوية ولقيت غزو من شباب زي الورد لابسيين البالطو الابيض بنين وبنات ووقفوا في الكريدور جنبي وراح واحد منهم سأل : هو فين المريضة اللي حنعطشها النهارده مجاتش والا إيه؟

قلت : أهلا والله وبقيتي فارة تجارب يا نوها

رفعت إيدي وقلتله أنا يا ابني

شويتين ودخلت بنوته برضو وقالت : هي المريضه اللي شاكين عندها سكر بول جت؟

راح الشاب قالها ثانيه واحده يا دوك

ووقف كلمها على جنب بصتلي مبتسمه وعايزة تعتذر بس عادي انا كنت قرأت عالانترنت وبحثت وفحصت يعني

المهم جه الدكتور اللي المفروض حيتولى الموضوع ومسك تحاليلي وقعد يتفاهم معاهم ويحكيلهم ويتناقش معايا ومعاهم وهما يضحكوا ويقولولي : ما شاء الله هو حضرتك طبيبة؟ أقولهم لا مريضة مزمنه ...يضحكوا ويقولولي ميزة ان المريضة تكون فاهمه وعيب في نفس الوقت ...المهم يا سيدي بدأوا يقيسوا ضغطي ووزني وعملولي تحاليل كل ساعه ومش ححكيلك اني اتحبست ربع ساعه في حمام الدور بتاع الغدد الصماء وطلعت اقولهم كده يا خونة تنسوني ههههه

المهم عرفت انهم طلبة وطالبات امتياز ولما بدأوا يسألوني قلتلهم حد فيكم حيتخصص غدد ؟قالولي : لا لا اعوذ بالله داه قسم مش لذيذ خالص

قلتلهم إذن مش حرد على اسئلتكم يا ولادي (:

كان يوم ظريف والله ربي يكرمهم ويكرمك يا بني والحمدلله النتيجة طلعت سلبية والهرمون زي الفل و كله تمام وباقي الهرمونات اساسا بيتم تعويضي عنها بهرمونات تعويضية ولله الحمد

يلا أي أسئلة يا دكتور والا خلاص عديت مرحلة الغدد الصماء؟ (:

مدونة خالد يقول...

ربنا يوفقك في مشوارك الطبي .. واتمنى ألا تصاب بهذا التبلد في الحس اﻹنساني الذين أصبح بعضهم تاجر في الطب.

دكـــــتور جدا يقول...

د.ابراهيم
ربنا يكرمك يا أخي
زي ما حضرتك قولت التعامل الجيد مع المريض هيخف عنه كتير وهتكسب قلبه
ربنا يكرمك

دكـــــتور جدا يقول...

أ.أمل (مدونة ما كفاية بقة )
وعليكم السلام
جزاكم الله خير على الاطراء الذي لا أستحقه
ربنا يكرمك

دكـــــتور جدا يقول...

ماما نور
في البداية الف سلامة على حضرتك
والحمد لله التحاليل طلعت كويسة
بالنسبة للغدد الصماء أنا ماليش فيها قوي
أنا مشرط ! أقصد جراحة
ربنا يكرمك يارب
دعواتك ليا كتير

دكـــــتور جدا يقول...

مدونة خالد
ربنا يكرمك
وان شاء الله هحافظ على الحس الانساني تجاه المريض

zahraa يقول...

ربنا يعينك يادكتور
وتكون سنة الامتياز سنة تدريب وتعلم لكل مايحتاجه الطبيب المميز ,,

متابعين باقي الحلقات :)

دكـــــتور جدا يقول...

زهراء
ربنا يكرمك
ان شاء الله نحاول نكون أطباء متميزين
دعواتك

norahaty يقول...

السلام عليكم
مش برود لكن أئتلاف
الأنات والأهات فعلا بياخد
منك شىء فى شىء,كمان الروتين
والتعقيدات ومرورك بتجارب
وتصادمات كتير مع النظام
كل دا بيغيرك شىء فى شىء
كمان أكتشافك ان كتير من
الناس وللأسف (متمارضين)
مش مرضى فى حقيقة الأمر
معلش انا بكلمك من
منطق انى شغالة من قبلك
بزمن وشفت كتير وبأعترف
انى تغيرت .

كيميائية يقول...

ولهذا السبب انا لا اذهب الى طبيب مهما اشتد مرضي ومهما عانيت
لكي لا القى هذا البرود الذي يؤلمني اكثر من مرضي.
كدت اقتل طبيبة في مشفاكم استهزأت من توجعات وانات أمي وهي مريضه هناك.
دائما ما أقول أنه حري بهم أن يعلموكم في الكلية طب القلوب قبل طب الأبدان.
شخصكم الكريم ليس يندرج تحت كلامي .
وٍسأدعوا لك أن يحفظ لك قلبك الحنون على مرضاه.