الثلاثاء، 4 يونيو، 2013

يوميات دكتور أشعة 2 - ولد ولا بنت ؟!

يوميات دكتور أشعة "2"
(ولد ولا بنت يا ضاكتور؟! )

 

من عجائب حالات الاشعة اللي لاحظتها بعد فترة أثناء فحص الحوامل الاجابة على اللغز المحير وهو " ولد ولا بنت يا دكتور ؟؟"
نصحني كثير من دكاترة الاشعة الكبار الا أجيب على هذا السؤال تجنبا لوجع الدماغ حتى لو كنت عارف .. ونصحوني أقول للعيانة اي كلام زي "دا مش هيبان دلوقتي ! ".. "دا العيل مدينا ضهره ! " .. " الواد رجليه متنية ومش باين حاجة !" .. وأي هري في أي كلام وخلاص

من المواقف الطريفة
(عيانة في الشهر التامن)
- هو ولد ولا بت يا ضاكتور ؟
- ولد يا مدام
- بجد يا ضاكتور ؟
- آه وربنا ولد وهصورهولك أهوة ( تك تك تك) .. أي خدمة
- أصل يا ضاكتور واحدة قريبتي الضاكتور قالها انه ولد ولما ولدت لاقيته بت !
- بصي لو مطلعش ولد ابقي هاتيه وريحي دماغك
- شكرا يا ضاكتور
- العفو يا مدام


--------------
(عيانة في الشهر السابع )
- ولد ولا بت يا ضاكتور
- ولد يا مدام
- طب والنبي يا ضاكتور ما تقولش لجوزي ولا تكتبه في التقرير !
- حاضر تحت امرك بس ليه مش عاوزة جوزك يعرف انه ولد ؟
- عشان تبقى مفاجأة ليه يوم الولادة !
- طيب ربنا يقومك بالسلامة
( ولابد من غلق الحوار تجنبا لهري الستات )

---------------------
(عيانة ف الشهر التاسع)
- ولد ولا بت با ضاكتور ؟
- ولد يا مدام
- طب والنبي يا ضاكتور ما تقولش للولية اللي برة دي اصلها جارتي وعينيها وحشة
- حاضر يا مدام و ربنا يقومك بالسلامة


-------------------
(مريض بالكبد وبعد الفحص )
- ولد ولا بت يا دكترة (هئ هئ هئ ضحكة صفرا )
- نعجة !
( فأُسقط في يده ولم ينبت ببنت شفة ! )